آسواکانیوز(چهارشنبه/۵اسد/۱۴۰۱): هیات عالمان دینی پاکستان به رهبری مفتی تقی عثمانی که از چند روز به این‌سو در کابل به سر می‌برند، امروز چهارشنبه، ۵اسد با ملا محمد حسن آخوند، رییس وزیران کابینه سرپرست دیدار و گفت‌وگو داشته است.
عالمان دینی پاکستان از بهر گفت‌وگو با هیات طالبان پاکستانی به کابل آمده‌اند و در جریان چند روز با نورولی محسود، رهبر طالبان پاکستانی نیز دیدار کرده است.
عالمان دینی پاکستان در دیدار با ملا حسن آخوند از به قدرت رسیدن طالبان در افغانستان ظاهراً خوش‌بینی کرده و برای تحکیم بیشتر آن دعا کرده‌اند.
خبرگزاری دولتی باختر نگاشته که در این دیدار رییس وزیران کابینه سرپرست گفته:«اکنون در افغانستان علما حاکم استند و آنان نسبت به هر کسی دیگر به ارزش و ضرورت علم بیشتر آگاه‌اند.»
با این حال روزنامه اکسپرس تربیون پاکستان گفته است که نشست و مذاکره عالمان دینی این کشور با تحریک طالبان پاکستان نتیجه مطلوب در پی نداشته است.
