طالبان: شرکت بین‌المللی CNPCI چین به دلیل امنیت خوب سرمایه‌گزاری خود را در افغانستان از سر می‌گیرد!
آسواکانیوز(چهارشنبه/۱۷حمل/۱۴۰۱): عبدالسلام حنفی، معاون اداری نخست‌وزیر کابینه سرپرست طالبان در افغانستان و هن ریومن، رییس شرکت بین‌المللی سی‌ان‌پی‌سی‌آی (CNPCI) چین در کابل دیدار و درباره سرمایه‌گزاری در افغانستان گفت‌وگو کرده‌اند.
انعام‌الله سمنگانی، معاون سخنگوی حکومت سرپرست به رهبری طالبان می‌گوید، آقای ریومن از تامین امنیت ابراز خوشی کرده و گفته است که به دلیل امنیت خوب، سرمایه‌گزاری شان را در افغانستان از سر می‌گیرند. آقای حنفی نیز تاکید ورزیده که حکومت کنونی از فعالیت‌ّای اقتصادی و سرمایه‌گزاری در افغانستان استقبال می‌کند.
مولوی عبدالسلام حنفی برای ریومن اطمینان داده است که برای سرمایه‌گزاری‌های خارجی در افغانستان زمینه بهتر را فراهم می‌سازند و با شرکت های که در افغانستان سرمایه‌گزاری می‌کنند، برای عملی کردن پروژه‌های شان همکاری همه جانبه خواهند کرد.
